做生意幾時都講「噱頭」，而講到呢家嘢，八方就幾佩服啲台胞。好似台資大鞋商「永恩」，為咗慶祝香港上市十周年同埋旗下個女裝鞋品牌「達芙妮」面世十五周年，除咗搵嚟人氣組合S.H.E.做代言人，重會掟千二萬拍戲宣傳。
集團MD陳賢民（圖）初初好神秘咁話套戲初步籌備緊，咩都唔講得，但最後唔覺唔覺就講晒畀八方知。套戲叫「我愛達芙妮」，男女主角係任賢齊同劉若英，而導演同編劇，就係呢排成日喺電視見到佢打乒乓波食麥皮嘅張艾嘉。套戲係一般文藝愛情故事，但淨係個戲名就夠「硬銷」啦！
講開戲名，八方真係好想介紹吓呢位新相識嘅陳生個英文名，包你估唔到，叫做Keeper，唔知大家會唔會覺得人如其名呢？
傳真︰2623-9278
電郵︰[email protected]