小師妹做咗幾年記者，轉行做公關，跟住做議員助理，最近轉工，做企業傳訊，與好多好多記者一樣，殊途同歸。今年行業好似幾好景，記者紛紛轉工，乜唔係呀，傳媒人工較低，工時特長，九七後不斷減薪凍薪，𠵱家重唔趁機鬆人咩。小師妹話近日聽到「南早」有八個記者遞信，多數走上中環喎。
小師妹現在日日到中環返工，請左丁山食飯，以示慶祝，當然唔止請左丁山一個啦，要請埋佢嘅舊波士大編輯。大編輯指定要去IFC二期「國金軒」。點解呢？大編輯鍾意國金二期有大停車場，泊車容易，兼且國金軒係屬於美麗華集團，與國金二期其中一個大業主恒基兆業有屬從關係，所以肥水不流別人田，租到商場三樓最靚一個景點，外望維港，樓底特高，面積寬敞，坐落張餐枱櫈，唔會聽到隔籬講嘢！有此原因，國金一二期嘅租客如證券行、銀行人士到此食飯，就唔怕俾隔籬聽到談話內容啦。各位唔信，請到國金二期三樓另外一間日日滿座嘅著名食府試吓，就知道國金軒嘅優點喺邊。
不過嚟呢度食飯，最緊要帶多啲卡片，小師妹訂位，坐在入口旁邊，邊個入嚟都見到，於是乎，左丁山食完一餐飯，竟然收到十幾張卡片，收一張時，梗要派番一張，最後出現「入超」情況，真唔好意思。
國金軒主腦人施維亞突然出現，問佢點解咁得閒，貴為美麗華酒店總經理，重要來此坐鎮？施維亞笑曰：「新開張未久，要肉緊啲，呢處有咁多金融證券界大人物食飯，要一眼關七呀。」施維亞順手帶左丁山去睇埋川菜部（叫做亮明居），有全海景大酒吧，飯廳之大圓飯枱，設加高嘅吧台櫈，等啲人客睇海景，施維亞話啲年輕經紀dealer，特別鍾意喎！