日本餅級偶像歌手鄉裕美，雖然大前日興高采烈與一百名師奶fans，返到佢二十幾年前宣傳處男唱片嘅地方一齊坐過山車，嚟為新歌《比愛迅速》造勢，但鄉叔原來對人歡笑背人愁，因為佢已經同長住美國嘅第二任妻子離咗婚。
現年四十九歲嘅鄉裕美，前日突然喺個人網頁內宣布同第二任老婆、現年三十三歲嘅名美離婚。佢並冇提到離婚嘅真正原因，佢只係話大抵因為大家價值觀唔同，離婚係雙方彼此尊重所做出嘅結論。已經三年半冇出新歌嘅佢將會全力復出樂壇，並將於十月起喺日本舉行巡迴演唱會，為歌唱事業衝刺。
鄉裕美多年前曾與女星二谷友里惠維持過一段婚姻，九八年離婚後，佢又結識長住美國、紐約富商千金嘅日本女性名美。兩人喺二○○○年十一月結婚，婚後一直往來美國同日本兩地，但係呢段婚姻亦只維持四年零五個月。鄉叔其實都幾慘，佢第一任妻子一直唔妥佢，成日阻止佢同個女見面，𠵱家又保唔住第二段婚姻，惟有寄情工作。
此外，日本男星渡邊謙同佢老婆由美子嘅離婚鬧劇拖咗三年半之後，佢哋終於喺本月八日簽紙搞掂離婚手續，法庭重判渡邊謙唔使同老婆分產，渡邊謙今次真係可以鬆一口氣。