唐文龍前晚錄影鄭裕玲主持嘅新節目《百法百眾》，有人忽然興起問佢有冇俾女人呃過，唐文龍竟然話：「我遇到啲女人話走就走，佢要走你都吹佢唔脹！我都嘗試過俾女人hurt得好深！」
有冇俾對方欺騙金錢？唐文龍好無奈咁話：「樓就冇，係車同錢啫！不過，呢啲係你情我願，可以點啫！」唐文龍默認對方係圈中人，佢話：「係我入行之後識，即使𠵱家撞到都冇乜嘢，唔通追佢攞番咩！」
唐文龍同陳采嵐（前名陳少霞）拍過拖，亦都同關心妍傳過緋聞，大家自然會估佢講嘅女人係咪陳采嵐或關心妍，但唐文龍就唔肯承認同否認，話過去嘅事唔想多講。
不過，噚日關心妍強調同唐文龍係普通朋友，佢話：「我本身屋企有錢，我又唔揸車嘅，呃佢啲乜呢？再講，我有男朋友，同佢又唔係好熟，唔明點解佢要咁講。」
楊千嬅噚日喺商台接受訪問，佢隻新碟《Single》噚日推出，有唔少歌講感情，有人揣測係講佢同鄭中基嘅一段情，千嬅話：「咁啲人先有興趣買我隻碟，可能我遲啲出一隻叫做《Couple》講我結婚呢，可能出完呢隻碟我就唔再唱，不過都要等過幾年之後先有可能。」
梁洛施（Isabella）同劉浩龍等噚日喺沙田出席「好孩子．愛海港」活動，Isabella早前更為今次活動嘅廣播劇配音，佢話：「我覺得都唔係太難配，重好希望可以幫卡通片配音。」Isabella又話冇留意前日有關田亮同郭晶晶嘅新聞，佢話自己一直以來只會留意二人跳水嘅新聞。
日前有周刊報道邵傳勇喺銅鑼灣開嘅Joint十五餐廳嘅VIP房疑有色情表演，阿勇噚日喺大律師陪同下，喺餐廳舉行記者會，佢話失實報道令到佢個人、餐廳、客人以至無綫嘅名聲受損，佢要求對方盡快作出澄清，𠵱家亦研究緊會唔會採取法律行動，佢話之後會返無綫交代事件。
許冠文噚日喺將軍澳電視廣播城擔任無綫節目《香港直播》嘉賓，佢話今次係梁榮忠邀請佢，問到忠仔有冇請佢做《殘酷一叮》評判時，佢話：「佢有叫我做被叮嗰個，我可以着定條泳褲喺裏面，一邊棟篤笑一邊除衫，一定可以破紀錄。」
黃淑儀噚日喺將軍澳電視廣播城為佢即將主持嘅新節目《吾湯吾水》開會，佢話今次會返內地搜羅煲湯水秘方。問佢怕唔怕內地連食物都有假貨，佢話：「今次我都會有份落手落腳去搵材料，好基本嘅常識同味道我都知，應該都唔會有咩問題。」
