隔晚美股失驚無神大發神威，港股高開人人估中。恒指升過130點，埋單升96點。兩個月份期指升幅冇咁大，明顯高位有獲利回吐。成個禮拜計算，恒指仍有進帳55點。
國壽C輪4681：國壽（2628）最高5.30元，收5.20元，升0.10元，波幅唔算大，但啲C輪已經翻天覆地。最熱門嘅4681，高收24.5仙，大升37%，總成交金額1億元，打入頭10位。4681喺7月初夠鐘，溢價4.7%，槓桿率21.2倍（有效11.5倍），引伸波幅24.9%。升幅大過4681嘅，有3618，收3.2仙，彈45%。隻輪6月到期，溢價16%，槓桿率162.5倍（有效19.2倍），引伸波幅25.8%。
國壽C輪高價追唔過，提防正股冇力再上，就算上都水位有限。做嘢，不如趁低位買P輪，對象係3706。
平保C輪3837：平保（2318）收12.15元，升0.25元，帶動C輪飛上去。3837收19.5仙，升27%，唔算乾升，有15球易手，銀碼接近3球。隻輪7月尾夠鐘，溢價11.9%，槓桿率62.3倍（有效14.5倍），引伸波幅25%。咁嘅溢價坐盤，坐艇多過唔坐艇。另外隻3515，升幅更達71%，下月17日最後買賣，行使價13.32元，正股𠵱家低過行使價1.17元，隻輪最終命運都係冇嘢剩低。
華能C輪4501：華能（902）輕微升1格，好幾隻C輪意氣風發，當中4501收9仙，升32%。隻輪6月尾到期，溢價10.8%，槓桿率63.9倍（有效15.8倍），引伸波幅26.3%。去到尾，隻輪好難有得剩。
章盛