搞咗幾年，CAPCOM先出隻《生化危機4》，斷估第五集有排都未出，索性扭一扭玩法，將賣座元素搞過另一隻Game。呢款《DEMENTO》就以《生化》骨幹玩法為主，解謎搵路走，動作元素都算有，重有狗仔跟尾幫拖㖭，不過玩法卻係三十六着，走佬為上！
記者：朱崇德
遊戲類型：動作解謎
對應機種：PS2
遊玩人數：1人
行貨售價：$408
開發商：CAPCOM
(c)CAPCOMCO.,LTD.ALLRIGHTSRESERVED.
初見《DEMENTO》呢個遊戲名，真係有啲一頭霧水，原來名稱出自拉丁語，意謂「瘋癲」、「發狂」的意思；試想遊戲中只有18歲的女主角──Fiona，遇上車禍雙親當場死亡，醒後發覺被困神秘古堡；手無寸鐵之下，重要遇上永遠「殺不死」嘅怪物追擊，而可依靠的只有自己雙腳（着草），同一隻唔係時時聽話嘅自來狗──Hewie，你話有乜辦法唔發癲呢！
失控恐懼感超真實
講到動作解謎遊戲，當然以《生化危機》系列為經典啦！《DEMENTO》一開機感覺都幾相似，而且操作介面重有9成相像，老饕應該攞起手就識玩，親切度絕對100分！但玩落發現最大不同者，係大家用慣嘅火箭炮同機槍完全不見了，目的係要大家手無寸鐵面對古堡的巨大怪物，真係幾創新刺激吓！
追殺玩家嘅，全部都係古堡內的怪物僕人，每當佢哋發現玩家，手掣就會發出震動提示，愈近身就震得愈震撼，體感十足！初心者（新手）最基本的玩法就是拔足狂奔，但遊戲搞鬼處，就係同怪物近距離接觸或俾佢驚嚇，輕則行到跌跌撞撞跑唔郁，嚴重者會進入「瘋癲狀態」，全個畫面變為黑白，女主角Fiona會失去「控制」能力，後果當然係任人魚肉、甚至GameOver！創新嘅玩法再加呢種「失控」嘅感覺，真係好能令玩者有如置身其中，營造驚嚇壓迫力，絕對叫人透不過氣來。
着草少女放狗咬人
雖則「着草」係玩家嘅首要任務，但有限度嘅攻擊力，更令遊戲充滿着種種變數！Fiona身旁有一樣最強的武器——自來狗Hewie；狗隻所有基本操控都在右邊Analog掣，一般情況下，將手掣推向上，佢就會幫你自動搜索道具，方便好使，當遇到襲擊時，上掣就變為攻擊指令，咬住敵人時再按向上，即係向Hewie打氣，增長咬人時間，等自己多啲時間逃跑，都幾冇人性吓！靈活運用指令對解謎幫助好大。自來狗一般情況下都唔會太聽話，得閒表揚吓又餵肉佢食，有助增加彼此信任度及服從度，所謂養兵千日用在一朝，到危急時佢嘅服從，好可能救你一命，大家要記住。
床底衣櫃搵碇匿
講到動作解謎遊戲嘅戲寶，當然係謎題啦！雖然未係系列之作，不過問題都幾刁鑽吓！例如「中庭」嘅門鎖，竟然係用打字機「打印」出嚟；有啲人冇法去到嘅地方，要靠「小狗」出差！一人一狗，玩法始終都係多變啲嘅。至於玩法心得，呢度提提大家，其實好多衣櫃及床底，都係隱藏點，入咗去怪人就搵你唔到，並可回復「受驚嚇度」，平時要多留意記位！有時怪人亦會死守一啲位，呢種情況下大家就難免一戰，戰略是一邊放狗咬，Fiona就用「跑撞」及「腳踢」攻擊，一般5、6回合就會慘勝。不過大家記得在打到瞓低嘅怪人身上，攞回復及攻擊道具嘅戰利品。
