大班鄭經翰喺領匯事件中受盡千夫所指，舊年資助盧婆婆打官司時，被親政府輿論瘋狂批評，不過左報《大公報》噚日卻喺論壇版刊登咗大班一篇題為〈反對領匯上市的來龍去脈與種種因由〉嘅文章，篇文長達四千字，主要講反對領匯上市理據，左報突然畀個地盤大班唱反調，原來事出有因。
事緣《大公》舊年十二月出咗篇報道，關於大班涉及期指買賣嘅傳聞，又質疑佢喺領匯事件中牽涉利益，大班認為對方錯誤報道，即刻出律師信要求對方道歉，結果《大公》喺今個月五號就呢件事出咗個「道歉啟事」，但大班認為淨係道歉唔夠，要求《大公》畀番個機會佢申明立場，最終《大公》願意「割地求和」，畀番差唔多半版篇幅大班登文。不過《大公》同時刊登一篇「領匯事件的經濟影響深遠」嘅文，擺出唔畀大班一面之詞嘅姿態，實行大唱反調。
大班話唔要求對方賠錢，係因為攞筆錢都冇用，「最緊要市民知我冇炒過期指，我成世人未炒過期指，咁都寫錯好離譜。」大班又話，篇文本來安排月初刊登，但「上面」過目後遲遲未有指示，結果搞到噚日先出得街。
傳真︰2623-9278
電郵︰[email protected]