李永達選特首要組閣，但除咗大狀會考慮幫幫手外，其他民主派興趣唔大。李卓人話，佢要做永遠嘅反對派，唔會入閣；梁耀忠話佢唔識做官；不過最寸都係大班，佢不但唔會提名達仔，重話：「佢冇資格做我老闆，我都冇資格做佢夥計。」達仔就反擊話冇邀請過大班入閣。
湯家驊同八方講，如果要搵佢做梁愛詩份工就唔做啦，一來佢已經有好多年冇打刑事案，二來佢冇興趣做官，佢就寧願做達仔嘅顧問算啦。
工聯會棠哥噚日喺幾張報紙𡁻田少，話田少乜都要問中央係「陷中央於不義」，搞到啲人以為係中央操控特首選舉。田少就寸番棠哥話，自由黨邊好似工聯會咁，可以成日見中央？而如果冇中央支持，點選特首呀？
田少又話，民建聯同自由黨都冇人參選特首，民主黨李永達搵過佢支持，但佢就真係好難支持達仔啦！
傳真︰2623-9278
電郵︰[email protected]