曼聯喺前晚場英超聯大戰作客輸畀愛華頓○比一，輸波事小，最慘佢哋連風度都輸埋。
喺嗰場波曼聯以一球敗走愛華頓，最後重得番九個踢：後衞加利尼維利因用個波掟愛華頓球迷而俾球證直接趕出場；中場史高斯則因一嘢兜落對手中場基爾賓尼下體而領第二面黃牌離場；咁都未算，佢哋領隊費格遜重俾人影到同愛華頓領隊莫耶斯嗌大交（雖則莫耶斯話佢哋蘇格蘭人興喺球場咁做喎）。
曼聯之前一直喺英超聯玩晒，但家陣至今連續兩年食白果，條氣難免頂住頂住。之但係，佢哋身為大會，而且重係當今最有錢嘅球會，應該有啲器量同風度，𠵱家唔夠愛華頓踢就發爛渣，只會令人覺得佢哋輸唔起。
點都好，為咗廣大球迷着想，我求大俠希望曼聯可以重新振作，喺下屆同埋阿仙奴一齊捲土重來，再同車路士鬥過。如果下屆或之後幾屆英超聯好似今屆咁，俾車路士一隊玩晒，英超聯重邊度好睇㗎！
朗尼澄清冇打女友
講開曼聯，佢哋人氣新星朗尼早前俾英國小報踢爆打女友高蓮，𠵱家佢話會告嗰份報紙作新聞。但我求大俠認為事情唔係唔簡單，事關佢嘅汽水同波砵贊助商話明如佢唔出嚟澄清，就考慮同佢終止合約，所以朗尼隔咗成十幾日先至行動，擺明就係做啲嘢畀佢米飯班主睇。
多國盃仔有睇頭
繼英足總盃上演夢幻決賽（曼聯對阿仙奴）後，德國盃決賽嘅戲碼亦強，由拜仁慕尼黑同史浩克04爭冠軍；如阿積士噚晚贏到威廉二世入決賽同燕豪芬爭盃，咁就連荷蘭盃決賽都份量十足。今屆歐協盃啲強隊出晒局，決賽弱到震，好彩幾個本土盃賽決賽都有睇頭。
A高爾過檔真定假
前晚車路士主場鬥阿仙奴嘅英超榜首大戰，焦點包括近日新聞人物嘅後衞A高爾。車路士早前被指非法接觸呢位英格蘭國腳，想喺來季撬對方過檔。呢單嘢重未審出結果，但係當晚已經有車路士主場球迷，就向A高爾高舉「歡迎你」嘅標語，係諷刺定係當正A高爾真係會過檔呢？
孫明明畀心機呀
姚明帶領火箭成功以第五名打入季後賽之時，NBA嘅球探已發掘出另一個中國巨人——就係哈爾濱嘅孫明明。據報呢名二十一歲嘅巨人高達七呎八又四分三吋，體重亦有三百五十磅；難怪唔少球隊吼實佢。不過佢教練就話明明重好幼嫩，睇嚟要追上明哥重爭好遠。