禮拜一訪港嘅國家海關總署副署長孫松璞，噚日喺小特區嘅海關關長湯顯明陪同下，前往昂船洲海關船隊基地參觀，二撇雞湯Sir安排咗一場反走私演習，主角係兩艘高速截擊艇同淺水巡邏艇。
湯Sir同一眾海關高層，邀請「孫公」登上海關船隻「挑戰者型」出海睇呢場騷，「孫公」等內地海關高官，見到特區海關嘅快艇喺海上飛馳，都顯得好有興趣，重同湯Sir有講有笑。湯Sir就話，喺未來六個月，會重點打擊私油同走私冰肉。
兩地海關阿頭交流聚會，傾到未來合作當然唔少得，湯Sir講到，○六年深圳灣口岸開通，貨物由一邊海關檢驗過，將資料交畀另一邊海關，減少複檢機會，提高工作效率。
傳真︰2623-9278
電郵︰[email protected]