胡杏兒日前在官方刊物選舉中獲選為人氣偶像王，她與郭晉安合演的《同撈同煲》首播更獲逾二百萬觀眾捧場。杏兒表示拍該劇最難忘是扮鄧碧雲及狂NG累安仔汗濕西裝，故她會視該劇為代表作，並以奪取台慶女主角獎為目標。
胡杏兒和郭晉安主演的無綫劇集《同撈同煲》，上周首播平均收視高達三十一點，即獲二百零三萬觀眾捧場。這對日前在官方刊物頒獎禮中獲選人氣偶像王的杏兒而言，無疑是一種鼓勵。
杏兒大前年憑《流金歲月》中扮演智障角色而奪台慶「我最喜愛的飛躍進步女藝員」，到近日再次獲獎，未知杏兒會否寄望憑《同》劇角逐今年台慶女主角大獎？日前她在將軍澳說：「女主角獎唔敢諗住，只係希望呢部劇成為其中一部代表作，啲人會記起胡杏兒扮鄧碧雲。慢慢嚟啦，攞女主角係我其中一個目標，但要講天時地利人和，同睇觀眾鍾唔鍾意個角色。」
杏兒表示在《同》劇中與扮新馬仔的郭晉安初結戲緣亦令她印象深刻。她說：「安仔係一個工作認真嘅人，佢會畀好多意見你，同佢做嘢幾開心、幾舒服，佢脾氣好，有耐性，喺佢身上都學咗好多嘢。」
拍攝《同》劇期間，杏兒最記得有日跟安仔拍攝分手戲，但一拍就拍了幾個小時，累對方熱得全身標汗，濕透戲服，她說：「嗰日又熱又侷，佢着住件西裝，嗰場戲係講我唔想分手，但把口就嗌分手，表情又唔可以畀佢知我唔想分手，自己做嚟做去做唔到，我見安仔差唔多成件西裝濕晒，重好有耐性，話畀我聽應該點做好啲，所以都好多謝佢。」
採訪：朱倬誼
攝影：陳慧安
服裝：SistyrMoon
