恒生銀行噚日舉行一年一度嘅股東會，熱鬧非常，事關出席嘅股東人數，突破五百，比起舊年三百幾，多咗差唔多二百人。平時，恒生除咗喺總行頂樓招待股東外，都會開埋七樓個會議室，點知今年連七樓會議室都座無虛席，要設企位，幸好個會唔算好長，未至於企到腳仔軟，不過人數一年比一年多，睇怕恒生出年都要諗下辦法，點招呼一班尊貴嘅股東。其實咁多股東出席，或多或少反映恒生對股東唔錯，今年就準備咗每人一盒中式禮餅相送，盒面印有清明上河圖，股東食餅之餘，記住睇下盒底介紹清明上河圖對恒生嘅意義！
噚日請客嘅重有上海商業銀行，唔知係咪新總經理登場新作風，今年業績發報午宴，首次喺佢哋總行頂樓舉行。上商廚房嘅上海菜行內出晒名，難怪郭總經理諗諗下，都係決定請記者到頂樓食「私房菜」啦！
傳真︰2623-9278
電郵︰[email protected]