人大「釋法」，由喬曉陽落深圳揸旗，人大政協北上，全部聽話歸順「兩年」，下午見民主派，話自己不求達成共識，但求增進溝通！
「釋法」大局已定，今次純粹為當奴件新郎哥戲服長短而剪裁。對一啲市民嚟講，佢做兩年，又唔會減稅，你同我啲錢冇多咗，佢做五年，亦冇話會加稅，小市民亦冇食少兩碗白粥！
八方就聽到有啲屋邨師奶話：咁佢吹口哨吖嘛！正如自己啱啱請咗個菲傭，佢都未入門返工，就即時興奮到喺個大門口打鼓跳舞，癲癲喪喪咁，自己身為僱主，見佢咁豪放咯，個心都打個突，都想將佢個約，頭嗰六個月改為試用，睇定啲喇，容乜易到佢返咗工，抹窗煮飯唔叻，反而俾佢教識咗自己個仔跳土風舞㗎！所以畀當奴做兩年，係胡溫放心唔落，想試用吓。
最樣衰嘅，反為係詩姑同林公公，當初實牙實齒話應該做硬五年，見主人面色一變，即時改口！跟住，又有啲大陸「法律專家」話最多只准做七年，跟住又話十二年，點紅點綠，盞燈亂「斬」，下面啲左口人士，跟紅頂綠，今日黑明日又白，嘴形一開一合，緊貼快轉，咁先至係醜態百出！
民主派意見多多，中方唔係咁介意，但律師呀大律師咁，認為法律精神唔可以扭曲，正如余若薇講：「如果白紙黑字嘅法律係會因時勢改變，咁法律重有乜嘢可依？」法律界集體黑衣大遊行，祖國就最氣頂！中國人始終最忌唔吉利嘢，黑衣似乜？造成國際效應，大吉利是！聽講有中方官員問：香港有個自命超人嘅律師着條紅泳褲喺中環出位抗議，就咁俾律師公會辣手處分，紅色係喜慶洋洋色，大吉大利，咁律師公會齊齊着晒黑衫好似送殯，冒犯性更嚴重，邊個可以釘佢哋牌？
呢個問題冇人識答！於是阿爺好谷氣，覺得現時冇咗「行政主導」，而係慢慢變為「司法黑衣主導」，等當奴坐正，肯定要上頭落柯打做嘢咯！
咁搞法，第日香港咪連示威着乜衫嘅自由都冇埋？
傳真︰2623-9278
電郵︰[email protected]