二○○八年北京奧運會之馬術比賽，可能移到香港舉行，國際奧委會是否批准此議仍待繼續討論，尚未有結果。
辦奧運項目，要有自知之明，有咁大個頭，先至戴咁大頂帽，無謂打腫塊面充胖子。香港辦奧運馬術賽，牌面上只有一個中國冇嘅優點，就係香港賽馬會嘅馬匹化驗室、檢疫設施，肯定名列世界前茅，亞洲第一，遠勝北京，但弊在香港雖有馬場，但缺馬術比賽場地，而且缺乏觀眾，到時送飛畀學生睇呀？要知道，香港平時只有幾百人玩馬術之嘛！
報紙講到如果辦得成，特區政府會遷移位於沙田、馬場隔籬嘅體育學院，改建為馬術場兼馬房，咁就該煨咯，不單止沙田市民應該遊行抗議，全港市民、體育界都要抗議。體育學院經營多年，除咗方便沙田市民之外，不少人亦到此打波、練波、訓練，此地臨近城門河，背靠火炭火車站，唔揸車嘅平民都可輕易去得到，假如將體育學院搬咗去西貢（舉例），邊有咁方便呀？
四年一度嘅馬術賽，只為極少數嘅體育界高層、民政局長面上貼金，代價就係犧牲全港市民體育、精英運動員訓練，有冇搞錯呀？馬術比賽唔會帶來大量外國觀眾、外國遊客，亦唔會係宣傳性高嘅項目，香港特區爭嚟做乜？到時特區政府又會打馬會心口，要馬會出錢出力，結果就係浪費金錢，徒勞無功，犧牲馬會會員利益，全港慈善機構、志願團體嘅捐助，兼且對增加賽馬投注額，全無幫助。
與工程陳講起，佢話工程上冇話唔得，最好拆咗彭福公園、拆咗體育學院，改建馬術場，令建築工程界多啲工開，減少失業。不過佢話：「站在建築工程界立場，我好贊成；站在市民立場，請何志平、霍震霆高抬貴手，放過我哋，唔好搵我哋笨啦。」