由張學友主演嘅國語版音樂劇《雪狼湖》前晚喺紅館演出尾場，許志安、方力申同杜麗莎都有捧場，完場時觀眾企喺度拍掌五分鐘。今次六場演出，本來頭三場女主角係許慧欣，湯燦就做尾三場，點知前晚尾場忽然改咗由許慧欣做。
主辦人陳淑芬解釋：「好多謝湯燦嘅配合，因為第一場錄音上有啲技術性問題錄唔到，所以今場錄番，我哋怕有不必要嘅揣測，所以希望澄清番。」但係許慧欣話前日晏晝先被通知要做多場，佢話：「我心情本來已經放鬆，只來看表演，結果又緊張起來。」
馮仁昭有個朋友大前晚去咗睇騷，佢話湯燦當晚頻頻甩嘴，演出至尾段時重好細聲，唱歌幾乎冇聲咁滯，而湯燦前晚都冇出現，連慶功都冇到，似乎有啲嘢喎。
慶功宴上，學友、陳潔儀、許慧欣、于藝同杜鶴都有出現，佢哋大玩射香檳，搞到一地濕晒。學友話今次演出比想像中好，唔係只為票房，因為九七年公演時做得未夠好喎。學友重話佢老婆羅美薇一場都冇睇，不過個女就話好鍾意，而稍後學友計劃喺內地、美加同東南亞做巡迴。
容祖兒日前為一護膚品牌拍攝全新電視廣告，拍攝當日祖兒要喺商業大廈嘅天台曬足十個鐘。當日陽光普照，祖兒除咗要顧住擺甫士外，重要做足防曬工夫，太陽眼鏡同漁夫帽當然唔少得。
祖兒話：「今次廣告嘅idea好得意，我會有三個唔同嘅大、中、小體積同時出現，重成日要自言自語，幻想同變大咗嘅自己講嘢，諗起都幾搞笑。」
李冰冰早前被踢爆舊年夜麻麻去酒店搵朱孝天，朱孝天嘅日籍女友佐藤麻衣日前喺台灣話如果有人一腳踏兩船就會有報應。有傳朱孝天嬲到趕麻衣走，麻衣嘅經理人韓羅賢話：「他們原本是鄰居，但自從傳出同居緋聞後，孝天受不了壓力早就搬家，麻衣還是住在松德路公寓裏，兩人各住各的，何來趕出愛巢？」
上年七月趙薇涉及一宗打孕婦鄒雪事件，呢單案件日前已經喺北京市朝陽區人民法院審結。
由於趙薇辯稱自己喺爭執後即時離開，所以事件同佢無關，但係趙薇嘅司機就要賠償鄒雪嘅醫藥費同精神撫慰金約三千元人民幣。
梁漢文（Edmond）噚日喺美孚擔任節目《RooadShow紅人館》主持，請嚟方力申同郭偉亮做嘉賓。問Edmond會唔會問方力申同鍾欣桐嘅感情事，Edmond話：「就算我肯放過佢，大會畀我篇訪問稿都唔肯罷手啦。」
方力申就話唔怕Edmond問佢感情事，佢話：「我都冇秘密，要答嘅都答晒，佢問我，我咪問番佢一啲唔想答嘅問題囉。」
張惠妹（阿妹）噚日喺波士頓舉行畢業小型演唱會，同時間香港有雜誌報道阿妹懷孕消息，重話BB係王力宏嘅，不過原來只係流料。馮仁昭收到風，話阿妹同王力宏已經成四、五個月冇見面，而且阿妹去外國後冇肥到，反而瘦咗喎。阿妹一邊打電腦，一邊聽到呢件事，只係「啊」一聲，然後繼續同朋友icq，都冇乜反應。
