港股噚日大升，特別係期指，成個午市，由頭挾到尾。每當絕大多數人睇法側埋一邊時，股市好多時都會反其道而行。
美股周三大跌，個勢真係好弱，人人都預咗港股會趁勢調整多一次。冇錯，港股噚日早段真係大跌，恒指最低13401，跌成百點；期指最低13303，更大跌166點。不過，低位有支持，跌幅好快收窄。
下晝，期指大戶發功，一路掃到收市，結果期指反大升179點，以13648高位收市，由低水變成高水51點。由跌166點變成升179點，相差345點，一招大拗腰，大戶功力有幾高？可以得見。
期指帶動，現貨跟唔足，恒指收13597，只升得95點。噚日下晝大挾倉嚟得太突然，好多人措手不及，基本上市場睇淡的氣氛仍未扭轉過來，唔係下跌股（不計認股證）點會多過上升股咁多？
大市調整是否已完成，好難講，筆者就只係覺得時間已足夠，調整應已接近尾聲。不過，家吓外圍股市咁弱，而本港經濟方面又唔似會有大好消息，港股實在係冇大升嘅條件，但唔排除後市會在窄幅內上落，例如13200到14000之間，到時機成熟時，升浪才再展開。
一直以來，筆者都唔敢睇得太淡，近日同芬佬傾開，佢哋亦認為大市再調整之時，就係低吸機會，即使跌穿13320呢個關口，亦唔會跌得太深。事實上，噚日個市可以由低位抽番成3百多點，真係唔簡單，好友力量絕對不能輕視。
噚日午後大升市，係大戶掃滙控（005）觸發。滙控123元原本有7球「些那」，午市甫開，一分鐘內，全部掃清，其中有17手各24萬股，總值逾5億元，結果收124元，升0.5元，成交比前兩日倍增。滙控若確認重上10日線同20日線之上，有機會形成雙底，短期上升目標128元。
新世紀集團（234）跌穿1元，收0.99元，跌4仙，呢隻兼具旅遊同賭業概念嘅股票，現年度（06年度3月結）預測PE只係7倍，已有留意價值。聽講公司管理層正在新加坡做「騷」，稍後重會飛澳洲物色度假村項目，看來繼RoyalLondon之後，再有基金入股的成數頗高。
郭兆誠