組合2R日前親自下廚煮兩味，炮製住家菜泰星炒烏冬，負責揸鑊鏟的Rosanne不慎放下太多魚露，令烏冬又鹹又濕，雖則後來加水補鑊，但二人身上仍傳出陣陣魚露味，十分搞笑。
女子組合2R從新加坡來港發展後，姐姐Rosanne與胞妹Race相依為命，Rosanne在家中更專責做住家菜。日前2R在尖沙嘴親自下廚整幾味時，表現有板有眼，不過揸鑊鏟的Rosanne在炮製她自創的泰星炒烏冬時，就因放下了太多魚露，而要加水沖淡鹹味，雖則後來補鑊成功，但烏冬賣相卻顯得濕了點，最搞笑的是二人身上還多了陣陣魚露味。
事後Rosanne笑說：「平日由我負責煮嘢食，返屋企諗聽日食啲乜，然後去超級市場買嘢，煲吓湯咁。」在旁的Race即搭口說：「佢係飲食部，亦係財政部，我係打雜，會負責洗碗、切菜，我重係叉電部，屋企啲電器全部由我叉電。」
Rosanne稱早年與Race在澳洲留學時才開始學燒菜，當中經過無數次失敗，她說：「嗰時次次煮親嘢食，唔係太硬就係太鹹，整一餐要整足一日，煮嘅時候又因為不停試味道，到煮好之後已經試飽晒，唔使食，後尾就由妹妹試食囉。」
雖則Race食多過做，但她笑稱亦懂煲兩味撚手湯，包括西洋菜湯及番茄薯仔湯。Rosanne表示其父數年前生日時，她曾親自下廚煮給爹哋享用，本來2R也希望在下月的母親節，為母炮製溫情小菜，但因父母都在星洲，她們說：「媽咪好慘呀，兩個女已經好多年冇陪佢過母親節，但我哋會同媽咪講，日日都係Iloveyou！到時我哋可能會整張卡送畀佢。」
採訪：朱倬誼
攝影：何國豪
髮型：TavinLin@HairCulture
場地：BOOZEROO
