嘉華建材（027）配股集資額縮減一半，市場眾說紛紜，無論係監管機構限制，抑或係市場反應問題，已令市場對隻股印象大打折扣，皆因今次集資之後，抽水行動將陸續有來，真係想升都唔容易。
經紀黃話，雖然唔少人好似小初睇得咁淡，但佢問過機構投資者，發覺反應又唔係太差，據講有個馬拉賭業集團，喺今次嘉建配股中要咗唔少貨，並無同行相輕，反而係識英雄重英雄。
如無意外，嘉建同嘉國（173）將於今日復牌，到時相信會見真章。
雖然嘉華孖寶令濠賭股普遍回軟，但剛改名為黃金集團（1031）的邁特科技，據講今日帶傳媒到濠江睇賭場，公司管理層稍後又會到歐美進行路演，睇嚟動態仍然好積極。
相比起其他大型濠賭股，黃金集團的股價近期表現唔見特出，次次炒高都好似冇佢份，但都叫做企得穩，守住0.30元水平，唔知今次路演後，會否對股價有幫助？
慕容小初