日本著名搞笑演員松本人志雖然奇貌不揚，但同佢拍過拖嘅女星好似常盤貴子同優香等，個個都係靚女，羨慕死唔少男士。佢早排被傳搭上比佢細二十年嘅前SPEED成員島袋寬子，今期《Friday》就偷拍到松本戴上口罩以「變裝」look同寬子到快餐店買外賣。
據噚日出版嘅《Friday》報道，松本人志喺今個月八號，即係島袋寬子二十一歲生日嘅第二日，揸住自己架法拉利，載島袋寬子去涉谷一間漢堡包連鎖店買外賣。松本人志可能因為上次蒲ＡＶ成人影帶店俾人偷拍到，為咗防止被人發現同島袋寬子拍拖，所以就笠咗頂帽，又戴上口罩，遮晒塊面，而打扮得好有女人味嘅寬子就唔似松本咁閃縮，重全程笑騎騎，完全沐浴喺愛河之中。
「變裝」松本同寬子喺店內買咗漢堡包，由於係由女友畀錢，松本就俾人話佢又咁鬼孤寒。不過，三年前佢喺優香生日嗰陣，陪咗
女方去東京DisneySea玩之餘，又大送禮物，估計喺偷拍前，松本應該送咗份大禮𠱁寬子開心。佢哋嗰日買完外賣之後，就齊齊上車返咗松本屋企。
現年四十一歲嘅松本人志，上年六月已俾人見到喺東京一間大型超市嘅電器部同島袋寬子買嘢，佢哋呢段相差二十年嘅戀愛，已發展近一年時間。