嘉華國際（173）同嘉華建材（027）復牌首日，股價已經唔多好睇，噚日就更加走晒樣，小初重以為有事發生，原來係嘉建收市後批股，有春江鴨沽定貨。
受到嘉華孖寶股價不濟影響，噚日濠賭股全線表現都好肉酸，真係多得佢哋唔少。
除咗嘉華孖寶股價下跌令市場矚目外，剛公布業績盈利倒退的必美宜（379），股價亦勁跌45.76％，收9.6仙，成交股數5589萬股，金額658萬元。
必美宜榮登仙股行列，小初本來以為有炒家唔掂被斬倉，但經紀陳話唔係，好似係有個芬佬條氣唔順，要錢唔要貨所致。必美宜日前公布全年業績，盈利有2123.8萬元，比去年下跌成30.7%，兼冇股息派。
經紀陳話，江湖傳聞呢個芬佬喺去年必美宜以每股0.45元批股時接貨，一路揸到𠵱家，由於隻股業績唔好，所以狠下心腸沽貨，但計落都輸得好傷。
慕容小初