唔少人被泰國的民族情懷所吸引，若你都有這種情意結，可有想過為家居布置得充滿東南亞熱帶風情？屋主潘太特別喜歡泰式擺設，自己一向都儲唔少，趁住搬新屋就搵設計公司包辦全屋家具，要變出一間泰式屋企，大前提係裝修工程一概唔搞。只靠家具，再加入蓆料、木材以至裝飾品就得？且看下文分解。
記者：梁彩燕
攝影：陳陶鈞、伍慶泉
Model：Christine（HKGenesis）
鳴謝：SimpleLiving（21041822）
泰有Feel
踏門而進，迎上一身米白的牆壁，感覺開揚。一屋偏沉木色家具，襯上饒富東南亞色彩的布置，令人好快就沉醉於泰式居所的氛圍之下。屋主潘太為正宗香港人，但就偏愛泰式裝飾品，儲埋儲埋為數不少的家品，竟然可幫間屋平添不少泰國Feel。為咗配合番個主題，設計師Can就利用經常用來製作東南亞家具的木材，訂做全屋家具，配以蓆面、蓆布同玻璃，營造出濃厚的泰民族感覺。
粗木加藤蓆
要做到有泰Feel，設計主要以蓆面家具、粗木、中式Mix泰式為重點，客飯廳以水谷柳木為主調，但睡房、書房則轉用不同木料如沙比利和櫸木，以帶出同中存異的效果。Can話：「粗糙木材最能帶出味道，質感亦重啲強烈啲，但將整條木材製成大櫃就會變得笨重，所以大門側的鞋櫃、梳化後的地櫃、電視櫃、茶几以至SideTable，表面都用上塑色的藤蓆加以修飾，款式就變得自然又耐看。」
玻璃作平衡
當然，木色用得多會營造無形的壓迫感已經係老生常談，一屋白牆的確能幫助挽救不少，兼且利用櫃子同木色，將長形客飯廳的空間再平均分配，咁物件就唔會過於類聚或分散，顏色同空間感亦會密集好睇啲。同時地櫃、吊櫃同餐枱就裝上玻璃層架或玻璃門，視覺上都透徹得多，又有反射作用，屋內多點白，也能平衡當中的沉重視野。
另外，屋內布置也趕上了近年的布藝家具潮流，梳化以蓆布為面，便有助加重東南亞氣氛。緊貼其後的則拍住個相同闊度的地櫃，入門時視線可得以延伸，Can話「咁坐落去亦唔使黑沉沉、一嚿嚿咁得住響背脊，亦係擴闊視覺的巧妙之處。」
夜冷店尋寶
潘太雖然都講唔出特別喜歡哪類家品，但自己亦坦言「買吓買吓就愈來愈多同一類嘢」，就好似𠵱家屋企的裝飾品，都係多年來旅行時購入，無論遠如澳洲、近至泰國或大陸，始終都會找到心頭好。後來發現旺角花園街也是另一尋寶地，潘太雖然住到新界天水圍咁老遠，但有時去開旺角都會蒲吓夜冷名店譚才記。若想到夜冷店尋到寶藏，首要條件得擁有超級耐性同一對精靈眼睛不可，睇嚟潘太都具備了以上天資，家中飾品都以幾十蚊的冧樓價買回來，可能未必會是正宗泰國貨，但就勝在夾啱個Tone，先至布置到間屋咁有味道。
磨砂玻璃顯清雅
想貫切全屋的泰式家居感覺，不一定要用同一種木材才可營造到相同感覺嘅，若然其他房的擺設或儲物櫃，都採用客飯廳的水谷柳木，未免會太沉悶乏味，且睡房配以淺白色系最能帶出舒適感，所以就要從統一中求變。睡房的櫃都用上沙比利木，顏色同木紋上有微微的陰陽效果，木質較有光澤而紋理交錯，可耐腐、抗白蟻，最適合做家具。表面以磨砂鏡面代替全透明玻璃，效果實色得來同時也保留少許通透感，比全透明玻璃來得自然清雅。
書房實用至上
書房主要以較淺色、木紋較幼細的櫸木高身書櫃為主，雖然感覺有點過時，但市面淺色的木料選擇不多，櫸木仍可做到簇新自然的效果。兩座書櫃分別左右拍牆，中央偷通以玻璃門代替實心木門，既有防塵作用，亦提升通透感。板夾床則隱藏於書櫃下，平時就可騰出空間放置安樂椅。而書房另一端吊櫃則實用性較強，因為屋主書較多，故盡用了每吋空間，頂部放書底部放快勞不特止，書枱更偷去窗台部份空間，以延伸書枱的可使用空間。
