民主黨六子今日為反釋法北上深圳，不過要人哋聽得明你講乜，一定要講到流利普通話。好似單仲偕咁，就將篇講稿全部標晒普通話拼音，今朝上車去深圳前，重臨時搵個仔嘅普通話老師教多堂雞精班，確保人大班京官聽得明佢講乜。
而長毛就話，雖然噚日有報道話喬曉陽同佢有共同語言，都係哲古華拉嘅擁躉，但係唔會影響佢今朝去衝關。長毛今日好忙，下晝重要去立法會，夜晚去港大用英文講共產黨宣言，佢同單仲偕一樣要惡補。
除咗上深圳，立法會全體議員噚日都收到駐港解放軍邀請，五一勞動節參觀解放軍營，連長毛都有份。民主黨張文光話，中央咁多機關之中，解放軍對佢哋最好，至少做到一視同仁，唔會選擇性邀請。
傳真︰2623-9278
電郵︰[email protected]