香港本地練馬協會同馬會噚日合演陣前勒馬，搞到一大班八方嘅行家撲個空。噚日朝，協會原本有個記者會，話會大爆馬會取消雙糧、減人工等等刻薄員工嘅事，重會公開呼籲馬會落實騎師同練馬師本地化。馬會係香港最有地位嘅組織之一，八方嘅行家當然唔會放過機會收料。
點知馬會喺記者會前一個鐘先至發一張傳真畀協會，話下星期會同協會開會，商討福利問題。協會主席黃汝安又竟然話記者會收皮，要等下星期開完會先講詳情。馬會就話，經常有同協會開會講福利、人工問題，唔知協會有乜衰嘢爆喎。唉，八方行家忍不住大罵協會同馬會，跑馬係體育活動，但佢哋咁冇體育精神就真係好肉酸。
傳真︰2623-9278
電郵︰[email protected]