政務官前晚「歡送」老董，董曾兩對伉儷，表演交叉熊抱大擁吻嘅事件，由中環至馬會嘅精英專業階層，連日來，繼續成為欣賞指數至高嘅節目話題！
因為曾爵士表現熱情，迎接董夫婦，表現英國紳士上流社會遺風，不顧「男女授受不親」嘅中國式規條，輕吻董夫人趙洪娉女士嘅香頰，跟住進竟然想揸實A1號嘅玉手，影番張「齊歡唱、同慶賀」嘅靚次伯、梁醒波、余麗珍、李香琴式嘅粵語殘片劇終大封相，好睇過《大長今》！
點知說時遲那時快，變故驟生，董A1突然掃開當奴隻手，面露慍色，拒絕同當奴影相！
咁又好易明嘅！正所謂：新人不見舊鬼哭，你方下台我登場，今時你做咗水中月，我亦假假哋係昨日嘅鏡中花，董生鐵過楊傳廣，點知遭到政變集體大刺殺，搞到要扮企唔穩而保外就醫！董A1號着晒靚衫，戴齊珠寶，行上台啱啱轉咗兩個身，勢估唔到，咁快就全院突然停電。
觀眾狂噓，戲院經理唔見影，搞到一對生旦，要匆匆落台！
畀着平常嘅夫人，就算睇晒全套《大長今》，呢啖冤氣，又點會吞得落吖！董太冷不提防，慘遭「奴」吻，經已遭到輕薄，重想郁手郁腳？係咁易fing開，而唔係好似吳君麗怒摑姜中平咁反手一巴，經已係好有富貴人家閨秀風範咯！
老董亦好有實力喎！眼見成班新進AO，爭住同自己影相，唔係敬老，而係好似同一件前朝古董合照，好等將來向子孫炫耀，有如當年解放軍若然「解放」北平，見到末代皇帝溥儀，都會放低支槍，同溥儀影張相吖？好有紀念價值架嘛！唔通咁就即是擁護滿清反動統治、同滿洲國漢奸皇帝有感情咩？
董太，唔好嬲喇，呢啲唔係當奴嘅錯，係胡主席意思喎！下次跟老公上北京，中央領導人行埋嚟，不如fing甩胡主席隻手，咁至有性格吖係咪？
傳真︰2623-9278
電郵︰[email protected]