烏煙瘴氣！三山五嶽！重有老千被人用磚頭鋤爆手指！呢啲都係我哋自細從電視、電影得番嚟對麻雀館的印象。其實𠵱家的新式麻雀館已經大洗底，門面裝修摩登晒，重有女戥腳笑住輸錢畀你。最方便係唔使左刮右刮搵齊四隻腳先開得枱，打完兩鋪走人實冇人話你「割禾青」㖭！
記者：馬慶武
攝影：伍慶泉、陳陶鈞、馬慶武
Models：阿蚊、Va（D8）
竹館Vs雀會
竹館係香港除馬會外另一個合法賭博場所，竹館會逐鋪在客人贏的錢裏面抽佣約$20至過千元不等；同時政府規定竹館要在每晚12:00mn關門，逾時即屬非法賭博。雀會僅提供場地予客人打牌，不設戥腳、不可賭錢。
廟街竹館專吸中外遊客
經理、茶水、戥腳、收銀，「廟街麻雀館」大部份員工都係女性，感覺平易近人。而且呢間麻雀館竟然歡迎遊客參觀，運桔唔會被人鬧兼有專人招呼，重有中英對照教你打牌，對好奇嘅中外遊客嚟講真係好吸引。
「我哋除咗做生意，其實都想推廣『打麻雀』呢項中國人嘅運動。以前啲人驚入竹館，因為形象神秘、黑暗，我哋就轉用透明玻璃門，列明一切規例、輸咩牌要畀幾錢出嚟，採取開放的態度。唔識打牌的客人，或者唔知竹館規例的客人嚟到，我哋都會慢慢講解，聽完唔打都冇問題㗎！」靚女經理阿莉重話希望麻雀館能成為香港的旅遊點，就好似澳門的賭場一樣，玩樂性質多於賭博成份。
廟街麻雀館
地址：佐敦道廟街253-255號地舖
電話：27302621
營業時間：12:00nn-12:00mn
鋪晒地氈免費魚翅口浪口
一入門口，腳底感覺軟腍腍，原來呢間麻雀館鋪咗地氈，牆身、圓柱、甚至洗手間明顯喺設計上花過花思，老實講呢間麻雀館嘅擺設真係似酒樓多啲！呢度長期人氣旺盛，環境吸引，連洗手間門口的裝修都好有心思掛住個「茅廁」。全場重有勁多靚女戥腳，無論輸贏都對住你笑笑口，大吉利是講句，真係輸錢都輸得開心啲！呢度的外賣跟足竹館規矩任叫唔使錢，經理忠哥更話：「叫鮑魚、魚翅食都得，不過當然要『打大啲』先得啦！」
濠江麻雀娛樂公司
地址：旺角彌敦道607號新興大廈地下G11-23號舖
電話：26259991
營業時間：12:00nn-12:00mn
雀會搶客新招
通宵牌送酒店海景房
後生仔女始終鍾意自成一隅柴娃娃開枱，呢間位於酒店內的皇雀會房間夠晒豪，大梳化睇足球直播係基本嘢，最正係每間房都免費提供寬頻上網（要自備手提電腦），而且房門有電腦鎖、廁所門重有電動開關。最破格係新推出的雀局餐送埋酒店房，$888免12小時房租，有餐食重有一晚酒店房，啱晒好似阿Ming呢啲住新界喺香港返工的雀迷。打完牌沖個涼，瞌番幾粒鐘再返工就最Perfect！
皇雀會
地址：灣仔謝斐道303號王子酒店8-10樓
電話：31882200
老牌雀會自動洗牌
美滿會屬老牌雀會，雀局價錢較平，重有代客入咪表服務。呢度重有共16間設自動洗牌機的房間，唔使有排等。
美滿會
地址：紅磡機利士北路661號地下至4樓
電話：27739882
幾十款麻雀任揀
打麻雀都可以好講究，講究到有幾十款唔同大小唔同顏色嘅麻雀畀你揀。另外重設有貓頭鷹時段，房租$18就可以打足12小時，抵！
金雀會
地址：土瓜灣馬頭角道28號金都豪苑1樓
電話：27221722
