重有兩個零禮拜，就到母親節，尖沙嘴海港城商場，率先推出慶祝活動，由今個禮拜六起，至五月八號母親節當日，只要捐出五十蚊，畀香港血癌基金，就可以參加親子蛋糕製作班，同仔仔囡囡一齊整餅，完成作品重可以帶返屋企，一家享用。
另外，假如你有三個仔仔囡囡、或四代甚至五代同堂、又或者同仔女同月同日生日，是但符合上述一項條件嘅媽媽，就有機會喺母親節當日，同公眾分享做媽媽嘅苦與樂，同時可獲贈精美禮品。
除咗母親節，五一勞動節黃金周更加係各大商場招攬自由行人流嘅大日子，海港城預備咗連串活動同表演，而購物滿五百蚊，重有購物袋換。至於信和大角嘴奧海城商場，黃金周期間，買嘢滿五百蚊兼出示旅遊證件，就送歐洲紅酒，擺明益遊客。
大長今勁熱，地產商爭相邀請劇中演員，來港協助宣傳。繼幾位忠角之後，戲中即將衰收尾嘅大奸人崔尚宮（甄美莉），會親臨香江，而近期戲份愈來愈重嘅皇上中宗（任豪），亦會同行。出沒地點係將軍澳東港城，時間係今個禮拜六下晝三點。屆時重有一班無綫藝員，齊齊同街坊影迷見面。
今次活動叫「大長今韓豐席捲東港城」，有醒獅、韓國擊鼓、韓國宮廷舞睇，同場會慈善拍賣，實行文化交流一番。
另外，韓國觀光公社同埋新地租務部副總經理鍾秀蓮亦會出席。
尖沙嘴凱旋門一出，新地各盤讓路。剛剛升咗做新地代理執行董事嘅周國賢話，荃灣爵悅庭東爵軒，要再延遲至下月初先開賣，有興趣嘅，現時可以先買南、西、北爵軒，呎價四千五，重話包冇錯。
佢話，同銀行傾好，鐵定推出定息按揭，年期超過一年，佢強調，今次利率會好優惠。
港置贈興，送一個月勞斯萊斯接送，值八萬八，名額兩位。噚日開記招，特別安排部勞斯萊斯，接周國賢到場，另外，為咗賀佢升職，有蛋糕同佢慶祝，佢亦好開心咁派新卡片。
自由行威力強大，自由行客鍾意買化妝品，令各大化妝品牌公司生意源源不絕，承租力驚人，最近爆發同行爭舖戰，佢哋搶舖出手闊綽，好似連鎖店BodyShop，聽中記講，剛以每月四十五萬，租用銅鑼灣羅素街六十號千呎地舖。
個舖原由歐萊雅以三十萬租用，新租貴一半，要四百五十蚊呎。呢個舖係小巴大王馬亞木年初以一億零八百萬買入，回報會由三厘三升到五厘。
上周，卓悅化妝亦以四十三萬，預租同區恩平道五十四號地下，八百呎，都要五百幾蚊呎。
電郵地址：[email protected]