韓國人氣劇集《大長今》中兩位重要演員「小長今」趙貞恩與「鄭尚宮」呂韻季，日前來港宣傳四日，昨日已轉赴台灣宣傳。二人日前接受訪問時表示對香港留下深刻印象，但小長今表示因時間緊迫，未能到海洋公園遊玩而感到失望。
小長今趙貞恩與鄭尚宮呂韻季日前在黃埔海逸酒店接受專訪，問小長今首次來港感覺如何？她透過繙譯說：「好攰，本來我好想去海洋公園玩，但冇咁嘅機會。不過今次嚟香港都好開心，有咁多人歡迎，又見到好多高樓大廈。」
未知小長今可有買手信給親友？她說：「冇時間，而且都唔知買乜嘢好。」原來小長今最愛吃香港的魚蛋，雖然韓國也有魚蛋，但兩者味道卻有很大分別。
問小長今在《大》劇中最想飾演哪一個角色？她不假思索說：「大長今，因為我唔想做奸角。」小長今希望長大後在娛樂圈發展，而在芸芸港星中，她最喜歡成龍和陳慧琳。
早前小長今大讚閔大人池珍熙有型，未知將來選男朋友會否以閔大人作標準？小長今搖頭說：「呢啲大個先算，我𠵱家冇男仔追，我唔想拍拖，因為啲男仔好煩，但間中我都會同啲男仔玩，因為我有啲男仔頭性格。」
至於入行四十年的鄭尚宮，談到對香港的印象時，大讚香港人充滿活力，她說：「香港係一個好高級嘅城市，啲人好活躍，連小朋友都識講英文，真係好叻。」
有一子一女的鄭尚宮，揚言一向專注事業，絕不是個稱職的家庭主婦，鄭尚宮說：「就連屋企人生日，我都試過因為做嘢而陪唔到佢哋。」可見鄭尚宮確是一個典型事業型女性。
採訪：王崇穎
攝影：林德雄
