中藝昨日在金鐘舉行三千萬翡翠首飾騷，前日因病缺席頒獎禮的佘詩曼昨日精神不錯地示範一千四百萬首飾，她更自爆二十一歲時曾收求婚鑽戒，嚇得她即時退還對方。
佘詩曼前日以不適為由，缺席人氣頒獎禮，最終獎項全落空，有傳她因沒有獎攞而不出席活動。昨日佘詩曼在金鐘出席中藝舉行的「翠繹濃情」珠寶展，穿上金色tubedress與男模特兒扮演夫婦出場。
昨日現場所見，佘詩曼精神與狀態甚佳，事後她接受訪問強調因病缺席前日的頒獎禮，她說：「我食錯嘢，腸胃炎入咗醫院，可能食咗早餐，啲蛋唔熟。我真係諗住去，重買咗件靚衫，嘥晒！」問她四獎均空手而回，可覺不值？佘詩曼說：「其實每年咁多頒獎禮，有份提名就得，都係志在參與啫！點解輸？可能復活節假我嘅fans去晒旅行冇投票啩！」
佘詩曼又自爆曾收求婚戒指，她說：「嗰時二十一歲，啱啱讀完書，個男仔送隻求婚戒指畀我，嚇到我即刻遞番畀佢，幾多卡都唔知。」
昨日共展出總值近三千萬的翡翠珠寶，佘詩曼示範的其中一套價值近九百萬、以圓形翡翠及鑽石為主，非常高貴優雅。佘詩曼謂家中亦有翡翠首飾，她說：「嫲嫲留咗啲家傳之寶畀我，啱結婚戴，我未有場合適合，嫲嫲九十幾歲都話希望我快啲嫁，不過都要等到有一個固定嘅男友先㗎！」
採訪：RitaLeung
攝影：ChenWaiOn
