英國巨胸名模佐敦（Jordan）現正懷有未婚夫PeterAndre嘅骨肉，一個待嫁嘅孕婦理應好開心，不過佐敦近日接受訪問時，自爆佢同過氣球星約基（DwightYorke）生嘅大仔夏菲（Harvey），除咗失明同有糖尿病之外，重百病纏身。佐敦話夏菲嘅脾氣古怪，性格暴躁，懷疑個仔有自閉症。
佐敦近日接受英國《OK！》雜誌訪問，佢話夏菲自出娘胎已經證實係失明同有糖尿病，令到身為人母嘅佢好唔開心，不過原來夏菲除以上兩種問題之外，𠵱家重有尿崩、腦垂體荷爾蒙發育不良、甲狀腺功能不足同埋腎上腺皮質功能失調等，認真可憐。
不過，最令佐敦傷心嘅係夏菲性格沉默孤僻而且非常暴躁，成日郁手打人，連阿媽都照打，𠵱家佢正觀察夏菲，睇吓佢有冇患上自閉症。另外，夏菲雖然到下個月先到三歲，但佢嘅體重已經接近七十磅，係一個八歲正常小朋友嘅體重。
佐敦話：「佢𠵱家好大嚿，有時我好難㩒住佢，因為呢個原因，我哋連餐廳都唔可以去，因為我唔知佢會唔會突然失控。」之後，佐敦重話個仔將會一世都會服用四種藥物，佢好傷心咁話：「醫生話我知夏菲嘅青春期會嚟得特別遲，佢重可能永久不育，我真係好傷心。」此外，同樣係身懷六甲嘅BritneySpears因為早排落紅入院，佢媽咪特登請咗成隊醫護人員照顧佢，因為如果呢種情況再次出現嘅話，Britney隨時會小產。