噚日中大校長劉遵義出席中大同北大合辦嘅「北京大學圖書館珍藏古籍善本展覽」開幕典禮，有內地記者問劉校長，喺搞緊「國際化」嘅時候辦呢個展覽係咪有特別意義，佢即刻一輪嘴咁話「國際化」其實包埋中國內地，又話同北大關係一向都非常好，重扯到去中大弘揚中國文化嘅使命云云，講講吓講到面都青埋。
講番個展覽，今次呢百幾冊古書嚟自北大圖書館。館長戴龍基話展品總值有六百幾萬人民幣，其中有俗稱「金剛經」嘅唐朝佛經《金剛般若波羅蜜經》手寫本，同埋史上最大嘅銅版印刷書《欽定古今圖書集成》。展覽由噚日起到今個月三十號，喺中大圖書館舉行，每日晏晝一點半至兩點重有北大圖書館專家帶領導賞團㖭。
區民傑攝
傳真︰2623-9278
電郵︰[email protected]