好耐冇見潮界萬事通「燈頭榮」，早輪佢走原宿牌子「拉把酷」撈咗唔少，不過最近已好景不再，燈頭榮：「唔好再提拉把酷啦，呢個牌子已經死咗，你見銅鑼灣間樓上舖無端端有批貨返就估到。老實講最近走原宿牌子麻麻地好搵，反而走日本電話就唔錯，事關3G剛剛開始喺日本普及，好多當地電話都可以喺香港上到3G台，你知日本嗰邊啲電話零舍型，帶過嚟香港好多人要。呢排最受我哋水貨佬歡迎嘅係SONYERICSSON802SE，部機喺日本由VODAFONE包起，摺機款幾靚仔，反應又夠快，有成130萬象素。淨機價成兩萬幾日圓，唔算平，不過我哋搭通晒天地線，搵班日本拆家以個人名義出機，慳埋機價，兩個月後Cut機，就可走過嚟香港賣，兩三千蚊部賣畀人，每部執成一兩千，好搵過走衫啦！𠵱家好多潮友都帶部3G過日本做埋漫遊，可以用番香港冧巴唔使煩。亦有啲醒目仔，去開日本順手買齋機，可即用有得威之餘，返港後才攞去先達改成中文機，扔上Yahoo拍賣場賣，亦可賺幾嚿，幫補水腳就唔錯！」
主持人：大食Jack
八卦熱報：[email protected]
