恒指早段升過124點，跟住冇乜氣，埋單只升57點。恒指雖升，但每有1隻股票上升，就有2.3隻股票下跌。嘉建（027）與嘉國（173）散12%與19%，影響人心，拖低股仔。如果朝早喺高位買入一啲熱門C輪，到收市埋單已經唔見15%，賺錢艱難輸錢易。
恒指P輪4662：個市有寒氣，感覺唔多好，做「賊」好過做「兵」。搵恒指P輪短炒，對象係4662，下月尾到期，輪價9.3仙，溢價2.4%，槓桿率32.3倍（有效20倍），引伸波幅15.9%。呢件上落好快好激，幾個鐘頭內高低波幅20%等閒事。若因市跌而隻輪升得太急，則唔適宜高追。
遠期恒指P輪變化冇咁大刺激，可揀3925，8月尾夠鐘，輪價20.5仙，溢價3.6%，槓桿率17.3倍（有效10.4倍），引伸波幅16.9%。
恒指C輪4745：恒指如果忽然散一二百點，恒指P輪彈上去，高追P輪又會有風險，可以調轉做嘢，低位買C輪，對象係4745。隻輪10月尾到期，輪價20仙，溢價3%，槓桿率15倍（有效9.4倍），引伸波幅18.1%。
恒指C輪3505，係低價仙輪，交投活躍，下月尾到期，輪價3.2仙，溢價1.7%，槓桿率98.1倍（有效34.6倍），引伸波幅13.4%。炒呢隻，要有心理準備冇得剩。
中移動P輪3655：中移動（941）收25.45元，升0.10元，估計惡唔得去邊，買P輪短炒，對象係3655，7月初夠鐘，輪價18.4仙，溢價3.1%，槓桿率13.8倍（有效9.6倍），引伸波幅21.4%。如果中移動跌得急，則反手做嘢，買番C輪博正股有技術反彈，正路之選係4571。
章盛