筆者出席咗由韓國觀光公社為劇中「小長今」趙貞恩同「鄭尚宮」呂韻季特設嘅晚宴，其中雙龍汽車本港代理特登派出長陣Limousine嘅Chairman車隊接送「小長今」及「鄭尚宮」，收到唔錯嘅宣傳效果。聽講遲吓《大長今》劇中演員重會陸續安排到香港做推廣大使，Fans就真係要留意吓呢款雙龍Chairman豪華轎車入面嘅坐上客喇！
記者、攝影：陳偉林
富士R2不過10萬
筆者早前曾聽過富士代理商話事人GlennTan提及，大概今年中旬會引入全新迷你City細車R2。呢款細車外形取材自甲蟲設計意念，既有活潑三門小跑車版的R1，又有家用型五門揭背的R2，採用660cc直列4汽缸DOHC引擎（馬力64匹），配合i-CVT無段變速自動波箱，加上耗油量特低，聽聞屆時新車售價更只約八、九萬，號召力十足！
記者：陳偉林
smart車主創意騷
早前smartclub喺淺水灣酒店搞咗一個別開生面嘅DIY比賽，參賽會員各自製作一件與smart相關嘅作品，意思同材料不限。當中會員共展示25件創意爆燈嘅作品，主要以smart標誌或smart汽車為主題，其中包括磨砂玻璃餐具、鐘、珠鏈、蛋糕、啫喱、3D立體圖畫、皮帶、相架、T-shirt、電話繩、盆栽同頭枕。當日車主駕同smartfortwo、smartroadster及smartforfour先齊集於赤柱聖士提反灣，然後再浩浩蕩蕩駛往淺水灣酒店，共享一個愉快下午。
記者：袁國基
