大市繼續反彈，但力度已轉弱，恒指最高13567，曾升過124點，但高位沽壓頗重，結果以13501收市，僅升57點，期指收報13469，又變番低水32點。家吓投資者都係等個市調整，所以一到相對的較高水平就減磅，藍籌重頂得住，三四線股就大圍都跌，噚日大市雖升，但上升股（不計認股證）只得185隻，而下跌股就超過420隻。
短期港股會受外圍左右，但點都要試多次底，中期調整先會完成。噚日同芬佬傾開，佢哋對後市唔係睇得好淡，認為13320呢個支持位即使跌穿，再跌嘅幅度亦唔會好大，13100至13200水平應該守得住，亦係趁低吸納嘅大好機會，佢哋推介嘅對象係長實（001）、太A（019）、新地（016）同恒地（012）。
慶鈴汽車（1122）派成績表，果如所料，盈利倒退，只得1.09億元人民幣，跌30%，每股盈利人民幣4仙，但派人民幣5仙。噚日下晝開市，股價只係挫一挫落1.55元，就掉頭而上，一路掃到上1.68元，收1.65元，升8仙，升幅5%。
早前已經講過，宣布業績後，股價回軟，就係最後低吸機會，但估唔到個勢咁強，係咁意低3個位，就見到大盤急不及待咁搶貨，成交大增到近5800萬股，慶鈴如果冇大動作醞釀中，幾難搵人信。
慶鈴H股發行12.38億股，日本五十鈴、摩根大通同鄧普頓揸咗2.88億股，佔23.2%，餘下相信有唔少已落在同路人手中。就以噚日為例，大戶起碼收咗3千至4千萬股，呢啲貨擺明係揸長線，若果再買多兩三日，貨源好易收乾，到時候，股價要舞高幾多，就任憑大戶心意。
國企呢輪好弱，但中石油（857）相比仍算強勢，3月中時高價5.15元，噚日收4.80元，跌幅只係6.8%。中石油中長線睇好，但唔排除短期會跌多轉，先完成中期調整，若有機會落到4.40元水平，就可趁低買入，大華繼顯同大和總研嘅目標價，分別係6.0元同6.30元。
中石油今年首季業績比預期佳，實現油價每桶37.63美元，同比升32.9%；原油產量1.99億桶，升3.6%，高於全年增長目標，預計05年盈利可再升23%，預測PE7倍，息率逾6厘。
郭兆誠