電訊魔鬼王維基Ricky出名寸，但八方覺得又真係抵佢寸，因為佢竟然搵到國家英雄「欄王」劉翔幫佢間香港寬頻拍廣告。點解搵劉翔？Ricky話係因為劉翔一句話：「我不行，我就不上，但如果我行，為甚麼不爭取一個機會？」咁欄王身價幾多？佢話唔講得，總之係公司歷來最貴嘅廣告，使咗幾千萬，但大部份係畀咗TVB買廣告。由於有田亮先例，國家唔想太過商業化，所以劉翔冇南下撐場。
劉翔點解會落叠？路邊社話，Ricky派咗兩個親信去北京做說客，向劉翔講解公司理念、乜嘢叫寬頻、公司背景，歷時幾個月。據聞，除咗誠意感動欄王，好大原因係劉翔覺得自己同Ricky理念相同，即係點？八方嘅理解係──即係大家都咁寸，而且寸得起。
唔信？大家睇吓個廣告就知，條片其中一段喺劉翔小學母校拍，係真人真事：老師問小劉翔會選邊個做班長，佢話會選自己！
再睇埋佢幫個廣告諗slogan「在零點零幾秒之間，壓過對手」、「別人比我厲害，我就要比別人更厲害」。真係fit晒成日要單挑電盈嘅Ricky合尺（何車）。
傳真︰2623-9278
電郵︰[email protected]
