賓架Ｋ睇地產版，講一間山頂獨立屋，價錢急升，價值近億幾兩億，但係此段新聞嘅標題夠晒抵死，就係AsCheapasaKowloonFlat，笑到佢碌地；左丁山想話搵番原文，但係搵唔到，冇法子求證，只能有聞必錄。
英文新聞標題，有時好有心思，非常醒神。報業公會之二○○四年最佳新聞獎之英文標題最佳就係《虎報》嘅HuandWenwillsayhowandwhy（講○七?○八普選問題），HuandWen就係胡（錦濤）溫（家寶）兩位領導人，香港到幾時先至有普選、如何選，點解有普選，點解冇普選，當然由佢兩位拍板決定。
賓架Ｋ最近管理大中華地區，對中日關係、阿扁動向，非常關心，因為大局有乜風吹草動，佢銀行啲貸款要小心昅住也，佢好驚李登輝趁往參觀日本愛知世博之便，暗渡陳倉走咗去靖國神社參拜佢嘅大佬靈位，到時海峽兩岸一定起波濤，中日之間更加難搞。以前中國可以窒住日本唔發入境簽證畀李登輝嘅，但日本以歡迎外國遊客參觀愛知世博為名，宣布暫時豁免所有台灣人嘅入日本簽證，咁樣李登輝就可以到日本講日文宣揚台獨，令北京非常頭痛。日本人在小事方面玩花招，激到北京壞，如果次次動真氣，胡溫好易壞身子。
眼見九龍豪宅創出天價，大家都唔想個市冧，希望中國學生示威反日，唔好搞到兩國擦槍走火，中日兩方之海岸巡防隊炮艦在東海如果發生碰撞事件，股市一定跌到四腳朝天，樓市亦難以獨善其身。
講起西九豪宅，地產Ｐ突然講咗一句：「假如西九文娛藝術區拍板上馬，西九所有現有豪宅都會在十年內對住一個巨型建築地盤，沙塵滾滾，噪音不絕！」左丁山話：「人哋出三萬一千蚊一呎買地盤旁邊豪宅，可能已經預咗聽十年噪音，否則佢會出到十萬蚊一呎㖭！」