無綫藝員邵傳勇前年頂咗郭富城喺銅鑼灣開設嘅餐廳，同幾位股東合資中式私房菜館Joint十五，近月邵傳勇將菜館轉營做法國餐廳，夜晚設有Disco，經營格局同以往有天壤之別。噚日就有周刊報道話佢間餐廳有性感女郎跳桌上舞，邵傳勇睇咗報道後同馮仁昭通過電話，佢顯得幾勞氣，重話已經同律師研究緊點樣處理呢件事喎。
邵傳勇話段報道係無中生有，佢話：「段報道話我客人嘅朋友係北姑，佢根本就唔係，至於話我間舖頭有女仔跳tabledance，我冇做過呢啲嘢！我對得住天地良心，𠵱家我同律師商議緊，我去埋平等機會委員會告佢㖭！」
邵傳勇又話件事令佢喺精神上受到好大刺激，對佢本人同舖頭嘅前途、聲譽、合作夥伴都有重大影響，重苦笑咁話要睇心理醫生，所以佢要求周刊對佢同公司公開道歉，還佢一個清白。
馮仁昭知道邵傳勇搞飲食多時，由肥媽火鍋、麻辣小喇叭至Joint十五，都花咗唔少心機，奈何次次搞生意都遇上唔少風風雨雨，睇吓呢次佢又點樣解決難題嘞。
胡杏兒同黃宗澤日前齊齊到香港演藝學院捧陳寶珠場，欣賞佢套舞台劇《劍雪浮生》。原來杏兒一直好欣賞任劍輝，對於寶珠姐喺《劍》入面飾演任劍輝，杏兒就狂讚話似。問杏兒想唔想同寶珠姐合作，佢話：「冇諗過可以同寶珠姐合作，如果真係可以，咁就會係好榮幸嘅事！」
繼《大長今》嘅閔大人（池珍熙）、小長今（趙貞恩）同鄭尚宮（呂韻季）到港宣傳後，崔尚宮（甄美莉）同中宗（任豪）又會喺後日駕到。兩位演員當日會喺下午三點去東港城同大家見面，到時佢哋會為兩隻醒獅點睛，又有韓國宮廷表演同現場慈善拍賣。無綫重會派出崔尚宮點名要再見嘅主持宋芝齡出席，而樣貌同崔尚宮好似嘅伍詠薇亦會做嘉賓，fans千祈唔好錯過喇！
鞏俐𠵱家喺美國準備拍攝荷李活新片《MiamiVice》，接受緊舞蹈、語言同射擊訓練，佢會喺片入面情挑男星哥連菲路（ColinFarrell）。鞏俐講笑咁話打算用電影《愛神》入面挑逗張震嗰雙手嚟迷惑哥連！不過鞏俐始終唔肯講挑逗張震嗰對手係唔係佢本人。
