李心潔因拍戲扭傷腳，前晚行動不便的她在灣仔出席新戲首映，要由郭富城及鄭伊健攙扶上台，城城指她有如皇后一樣。而腹大便便的黎淑賢笑言曾經以為老公盧惠光不育，幸好她現在身懷第二胎。
鄭伊健、郭富城、羅嘉良、李心潔及吳彥祖前晚在灣仔會展出席新戲《三岔口》首映禮，李心潔因早前在台灣拍《米妮》時不慎扭傷腳，行動不便，故前晚上台時，須由城城及伊健一左一右攙扶着。
城城笑說：「佢好似皇后咁。我喺戲裏面都有機會摸佢隻手㗎。」李心潔卻說：「我重着兩吋半高踭鞋，貪靚囉，醫生叫我休息，男友都叫我要小心，做呢行宣傳冇得唔出席嘛，我只可以企，唔可以行呀。」她近日更要到北京、上海及新加坡等地宣傳。
挺着大肚子的黎淑賢由老公盧惠光陪同到場欣賞電影，黎淑賢表示預產期為十月，她說：「我個大仔都六歲，叫做俊賢，𠵱家第二胎壓力都咁大，未知仔定女呀，我想生女。」
黎淑賢表示本預計大仔出世後三至四年便生第二胎，誰知一等六年，她說：「我重以為老公唔得呀，佢又煙又酒又雪茄又夜瞓，重着牛仔褲㖭。我上次生時，佢入產房睇見醫生想吸BB出嚟，已經嚇到佢走咗，佢話上次嚇親，怕自己性無能呀，重想衝去打醫生。」
而伊健接受訪問表示因拍無綫新劇《隨時候命》，本來下月初拍竣，但進度延遲，現在要六月底才加盟BMA唱片公司。郭富城談到反日浪潮時說：「更改歷史就係不當，絕對唔可能咁。」城城曾與日本藝人藤原紀香傳緋聞，問他可有向日本朋友解釋正確的史實，城城說：「我最近好忙，暫時冇時間。」此外，前晚電影公司與now.com合作，讓其將首映禮上載上網，無綫及有線採訪隊得悉後，即拉隊離場。
採訪：張俊銘 攝影：葉君海
