一直倡議香港開賭場嘅田少，上個禮拜特登去澳門視察，重帶咗五千蚊入金沙，一粒鐘後出返嚟，得番七百蚊，即係輸咗四千三百蚊。
田少噚日喺立法會同八方講，未去澳門前，佢個銀包有兩皮嘢（即兩萬大元），賭完馬之後得番五千，跟住就去澳門，點知輸埋，佢話今次就當係進貢咗畀澳門庫房啦。田少自認唔係好鍾意賭錢，不過入得賭場視察，都唔可以齋睇，點都要玩番少少，喺賭場入面講廣東話嘅都識佢，講國語嘅當然唔知佢乜水啦，裏面十個賭客九個都係講國語，真係反映中國人好賭嘅性格，中國有成十三億人咁多，香港真係要考慮開賭。
八方唔知田少係咪俾新加坡李顯龍刺激，猛話煲呔都去過拉斯維加斯訪問，相信佢點都會諗過吓開賭呢條路。
傳真︰2623-9278
電郵︰[email protected]