中國人民反日情緒高漲，日資公司屢受衝擊，連一啲似日本名嘅非日資公司都受到波及，招牌不保。喺呢股浪潮下，凡俾人覺得同日本有關嘅嘢都情況不妙。
蘭西突然諗起，長實喺將軍澳調景嶺地鐵站上蓋嘅新盤，個名就係和風味極重嘅「都會駅」，樓盤外牆，重大大隻字掛出嚟，如果個樓盤起喺大陸，重要咁啱坐落示威區附近，睇怕都好麻煩。好在香港人好理智，唔會亂嚟。
喺咁敏感嘅時刻，唔知長實使唔使改過個樓盤名呢？蘭西問番長實，佢地話其實用呢個名，只係想標榜物業坐落車站上蓋，而唔係想人諗起日本，所以，就唔會改名咁誇張。
其實，都會駅個駅字點讀，已經考起唔少人，長實話請教過高人，應該讀「澤」，但坊間就有人話要讀「驛」音，其實都幾混淆。
富豪酒店主席羅旭瑞愛女羅寶文，近年協助老父打江山，成績有目共睹，其實年紀輕輕嘅佢，仍未脫稚氣，噚日佢同集團董事范統、企業財務總經理梁蘇寶出席傳媒飯局，席間講到佢隻寶貝狗時，立即展視手提電話上狗仔玉照。
愛犬叫Bohdi，八個月大，係玩具貴婦狗。寶文話，隻狗好識歎，日上三竿都唔願起身，又要人餵先肯食嘢，試過三日唔餵，佢就三日都冇食嘢。坐隔籬嘅范統插嘴話，「嘩，千祈唔好咁樣縱壞你男朋友呀。」點知寶文話，「我都冇男朋友俾我縱。」
代理業今年積極擴軍，四月未過，利記新界擴軍計劃，已經超標。
利嘉閣執行董事廖偉強話，新界區嘅分行數目，本來諗住開四十間，𠵱家已經有三十五間，重有十間簽好約，準備開張。既然都超咗額，所以索性做大啲，開夠六十間，投資額亦會加碼一倍，去到二千萬，人手就加多五成，請夠六百人。
利嘉閣新界區董事陳大偉解釋，其實有CEPA、港珠澳大橋等利好因素，已經多咗外區廠家喺新界買樓，而且新界樓價又落後大市，所以佢哋先至咁有信心。
由前惠泰主席曾文豪家族持有，樓齡超過五十年嘅渣甸山軒德蓀道十一號，業主𠵱家委託RaymondHo&Co，代理招標出售，下月二十日截標。
董事何永輝話，物業佔地一萬呎，上蓋建有樓高兩層、實用面積五千呎嘅大屋。
由於間屋係五○年代落成，重建價值高，樓高及面積，可以分別增加至三層及六千一百呎。消息人士話，渣甸山屋地罕有，估計樓面呎價可達兩萬，市值億五。
軒德蓀道大屋唔少業主都係城中富豪名人，好似隔籬十二號屋，前業主係美聯物業主席黃建業。
電郵地址：[email protected]