為歡送董建華，噚晚全個政府嘅政務官差唔多總動員去歡送晚宴，灣仔萬麗海景酒店筵開二十五席，二百幾三百個政務官同場出現，真係政府難得一見嘅場面，更難得嘅係唔少元老級退休高官都捧場，東亞銀行李氏家族嘅李福逑篤住支柺杖到場，李福逑曾任民政司，係第一代華人政務官之一。
其他退休高官包括黃星華、麥法誠、霍羅兆貞、余黎青萍等，但就唔見老董愛將葉劉淑儀同林煥光，而後生一輩嘅政務官則人強馬壯，連老董都大讚港府政務官隊伍中有唔少年輕有為人物，令佢對香港前途充滿信心。
餐飯每位科款六百五十蚊，八方睇過菜單，以大酒店收費都算係咁，加埋咁大個場，所以就冇魚翅食喇。噚晚有份坐主家席嘅，包括政務主任協會主席尤曾家麗，陳方安生、董生同煲呔三對夫婦；重有曾近身服侍過董生嘅官員，包括羅范椒芬、林瑞麟、袁銘輝、葉文輝、羅智光、區璟智、孫明揚、王永平等，佢哋係咪特別官運亨通呢？有辦你睇啦。
傳真︰2623-9278
電郵︰[email protected]