估你唔到!七不思議便利店

估你唔到!七不思議便利店

24小時便利店,梗有一間喺左近。不過可能因為便利店太過密集,你亦太過習慣買嘢、畀錢、鬆人,通常會錯過一啲極為方便的服務。例如大至一部自動櫃員機(ATM),你都可以發雞盲視而不見;小至一部手掌咁闊的叉電機,當你部手機斷咗電都唔識行埋去急救。各位,是時候擘大眼,睇睇便利店有幾咁「不可思議」!

記者:邵超 攝影:陳智良
Model:Blanche、阿祺(allfromd8)

知唔知便利店可以叉電?
李小姐:「我知!用過㖭!$8叉一次,不過等咗20分鐘先至叉完。洗衫同曬相就唔知喎!」

知唔知便利店可以買UA戲飛?洗衫呢?
陳小姐:「係咩?唔知噃!洗衫都唔知噃!」

知唔知便利店可以食到出爐麵包?
林先生:「知道OK有麵包賣,不過唔知係新鮮出爐,所以未食過。」

一不思議
24小時有錢㩒

好多人都知道自動櫃員機(ATM)在地底(即地鐵、九鐵)以ETC機最多,而地面就以銀通機分布最廣。以旺角為例,搵部ETC㩒吓,排隊排到你儍!𠵱家㩒機唔一定要去銀行,逾20間7-Eleven都設有滙豐銀行或渣打銀行的ATM,咁就唔使同路人甲乙丙丁鬥快排隊啦!
CheckPoint:
ETC:旺角、深水埗、荃灣區等部份7-Eleven(查詢:www.hsbc.com.hk點擊7-ElevenIcon)
銀通:香港仔華貴村、淺水灣、大埔富善邨、將軍澳景林邨等部份7-Eleven

二不思議
UA戲飛即攞位

各大人流旺區的7-Eleven,擺放有「Jetso通」機,可與Cityline連線即刻攞飛。輕觸式屏幕揀中想睇的電影及場次,選擇付款方式(八達通、信用卡或EPS),就可以成功購票,手續費每張$8,4月30日前就送番你一張韓片《童行歲月》優先場戲票,賺番!如果你要同朋友睇戲,博一博分次購買,更可以多買多送。(5月起另有新着數)

CheckPoint:
大部份銅鑼灣、尖沙嘴及旺角7-Eleven分店

■Jetso通可購買UA戲飛,如果有埋百老匯院線、快達票就更Perfect!

■Jetso通購票暫時只有Cityline,有得揀座位㗎!

三不思議
手機相機急叉電

叉電機只係一個手掌咁闊,通常放在7-Eleven收銀機後面。呢部名為「SPEERON」的叉電機,任何型號的手機或數碼相機鋰電池,都可以在10至20分鐘內幫你叉滿電。如果電池太舊,就需要花較長的時間充電,部份舊款電池有可能不能承受極速叉電。
CheckPoint:
超過500間7-Eleven分店

四不思議
付現金八折洗衫

香港的洗衫舖好早收工,但我們的放工時間就不斷延長。如果你住喺葵涌浩景臺就唔使怕,因為午夜12:00mn前的7-Eleven有衫洗,由太古集團的雅潔洗衣提供服務,7-Eleven現金付款更有八折。(洗衣費請參考www.voguelaundry.com或致電21634308)
CheckPoint:
唯一一家:葵涌浩景臺7-Eleven

■一般雅潔洗衣會員才有折扣,但7-Eleven現金付款就有八折。

五不思議
$5醒你今晚食乜餸

7-Eleven的Jetso通,有提供菜譜瀏覽,備有中、英、菲律賓及印尼版本,只要付$5就可以帶埋一份菜譜列印本返屋企煮。

■菲傭只要搵到Jetso通,就可以列印菜譜跟住煮。

六不思議
非24小時便利店

7-Eleven和OK雖然是24小時便利店,但原來唔係所有分店都要日日做到無停手、年中無休。其實本港部份分店因位於地鐵站、九鐵站和商場內,所以每當地鐵、九鐵或商場關門休息,佢哋亦要跟住休息。

■位於沙田火車站的7籸leven會在車站大堂拉閘後暫停營業。

七不思議
阿姐即沖絲襪奶茶

OK便利店有麵包賣,個個都知。不過好多人會誤會麵包未必新鮮,或者咖啡、奶茶係現成即溝即開型。查實佢哋是正宗港式咖啡及奶茶,喺你落Order後就可以企定定等店員將美味的咖啡、奶茶送到枱上,變相是迷你茶餐廳。

■絲襪奶茶沖泡出來的味道,當然零舍不同。

CheckPoint:
現時共有37間OK分店供應Hot&In「好知味」麵包和咖啡、茶。

■OK用特別技術將麵糰送到分店,再即時加工焗製,新鮮!

■Blanche:「好好飲,真係有茶味,唔會好似飲緊水。」

■午膳時間有熱Pizza和意粉供應。

其他估你唔到服務
即磨咖啡賣高球

中環往愉景灣碼頭的OK便利店,是全港唯一一間有售高爾夫球用品和即磨咖啡的便利店。

$145

直銷都撈埋!

7-Eleven每月會出版一本《MicroShop訂購誌》產品目錄,所有潮流玩物和電子產品的精選產品都可以填張表格,貼上產品的圖像連條碼,交畀便利店職員,3個工作日後就可以收貨(滿$300)。

狂夾公仔玩遊戲

現時逾30間OK便利店設有夾公仔遊戲機,入$1就可以考你反應。午膳及放學時間,都會見到一條人龍等夾公仔。

先付款後送花

OK便利店推出咗「花文化」訂花預繳卡,面值分$50、$280和$380。打電話落定後,送花前可到任何一間OK便利店分店提取,非常方便。