律師黑衣白日遊行前夕，「香港良心」陳太終於出聲，話釋法係一個「唔好嘅開始」！
開講有話：「好的開始是成功的一半」，咁當奴未坐正，據陳太講，已經有咗一個「唔好的開始」，咁日後當奴又點樣面對漫長嘅十二年呢？
不過，香港嘅政治，始終步入緊成熟嘞！陳太同當奴，齊齊出席「歡送」老董嘅六國封相大戲宴，喺宴上，當奴伉儷同老董擁抱，陳太重大讚老董係一個好人㖭！
既然老董天上有地下無，咁陳太點解當日又拋棄老董呀？成個中環都話：陳太當日如果好似一個家嫂咁，忍忍忍，錢其琛叫佢洗衫就洗衫、土共叫佢舂米佢就舂米，一路湊住個蘇蝦，抹吓眼淚，一件爛衫，縫縫補補又三年，咁今時今日咪可以捱到出頭，幾時輪到當奴上位呢？
呢啲不過係馬後炮而已！陳太走咗，跟住就沙士、跟住又23條，陳太若然在位，沙士佢固然要孭到應，23條佢亦隨時要戴副太陽眼鏡同葉劉一齊着一身黑衣，扮到「黑玫瑰與黑玫瑰」咁嘅款，兩姊妹拍住上，陳太隨時要焗住成為維園阿伯夢中情人，陳太嘅花容月貌，隨時會搞到花晒，你話金枝玉葉嘅佢，面對維園高齡暴徒，又點樣忍落去呢？
所以政務司司長呢碗飯，係唔啱陳太食嘅！各有前因莫羨人，搞到上北京遭到花旗琛面斥，九七之後，陳太喊到梨花帶雨，行出嚟強顏歡笑，又點似得現時咁一家樂融融呢？
咁葉劉若然忍埋佢，話唔定凸首係葉劉做呢？凸首凸首，有名你叫，要肯凸個首出嚟，任人掟雞蛋，先至做到阿頭！唔鍾意余麗珍就玩完嘞，輪到姜中平上場做主角？呢啲就係天意咯。崔尚宮惡有惡報，望陳太做大長今？
傳真︰2623-9278
電郵︰[email protected]