細個嗰陣讀書冇乜心機兼走精面，例如考試考十課書，求其讀其中五、六課就算，務求啱啱及格，唔使留班或者踢出校便算對家長有個交代。爸爸對我咁有見地嘅讀書哲學非常唔同意，爸爸經常掛在口邊：「千萬不要以為書是為我們讀，書其實是讀進自己肚子裏，一定要為自己爭氣，自己不爭氣，誰也沒辦法。」
最近看皇家馬德里主場迎戰榜首隊伍巴塞隆拿，朗拿度的表現令我想起爸爸的這番話。朗拿度條友仔，前一排越食越肥，又要忙搞婚禮，冇乜心機踢波，令皇馬球迷開始厭棄佢，甚至破天荒地出現在主場向佢喝倒采嘅情形。朗拿度自己知自己事，一沉就百踩，一切都要睇自己，於是在榜首大戰中大發神威。
本來一直嘅表現都係懶懶閒，只係喺龍門附近行嚟行去，波唔交到腳都費事追，隊友諗住傳個靚波畀朗拿度扭動蛇腰爆入禁區勁射，但蛇腰已變成肥腰，爆唔郁。要踢爭氣波，朗拿度在數萬主場球迷面前重拾射門鞋，唔單止個人有波入，還巧妙二傳餵隊友入波，咁都唔止，更肥騰騰地跑返後場協助防守，這是以前見所未見的奇景，朗拿甸奴突然見到朗拿度成架貨車咁走到面前「嘜」自己重剷波㖭，當堂打咗一個大突。
結果皇馬在主場大勝當時得令的巴塞４：２，朗拿度接受全場球迷歡呼，雙腿迸發出久違了的球王光采。
「一定要為自己爭氣，自己不爭氣，誰也沒辦法。」爸爸說。