港股升番啲，恒指反彈88點，收13444，同全日最高比較則低59點。估計短期仍係擺上擺落，炒輪最好靈活走位，當恒指再升百幾點時趁低買P輪，恒指跌百幾點時趁低買C輪，賭個市唔係單邊發展。
滙控C輪3976：滙控（005）近日最低122元，昨日收123元，升0.50元。估計百二蚊齊頭關守得住，可以開始分段收集C輪。
滙控C輪遠期對象係3976，明年1月初到期，輪價39.5仙，溢價4%，槓桿率31.1倍（有效14.2倍），引伸波幅11.9%。4766成交金額大過3976，亦係可選之材。
中石油C輪3888：中石油（857）升0.10元，收4.775元。熱門C輪3888升11%，收17.4仙。油價近期偏軟，吼住下一回合中石油再跌之時，喺低位撈3888。
3888喺9月夠鐘，溢價4.2%，槓桿率27.4倍（有效11.1倍），引伸波幅22%。正股派息相等於股價2.9%，計埋股息因素，3888溢價唔算低，候15仙邊邊上車。
和黃C輪3561：和黃（013）升1格咁大把，熱門C輪3561升12%，對正股變化相當敏感。等吓先，見和黃回落三幾格，博3561。隻輪6月中到期，輪價13.4仙，溢價2.7%，槓桿率50.4倍（有效20.2倍），引伸波幅19%。要有心理準備，賭3561可以喺好短時間之內，贏20%或者輸20%。
國壽P輪3706：國壽（2628）派成績表後升0.15元，收5元。P輪3706收44仙，散23%。吼住國壽再升三兩格，低買3706，隻輪6月下旬到期，溢價0.8%，槓桿率11.4倍（有效8.7倍），引伸波幅22.7%。
章盛