45條關注組噚日舉行沉默遊行，長毛同阿牛都喺遊行隊伍中，兩個人都好守規矩，冇搞嘢，阿牛重着得好斯文，遊行近尾聲，長毛終於頂唔順，笑班大狀遊行唔出聲，重細細聲同八方講：「佢哋平日靠把口搵食，𠵱家合埋口。」之後佢急急攞啲傳單出嚟，叫大家記得參加4.24「反對釋法大遊行」。
長毛重話，佢聽日會去深圳闖關，實行學當年國父孫中山同蔡鍔討袁世凱嘅「討袁護法」，佢就「討喬護法」，目標人物係喬曉陽。長毛預先張揚，睇怕深圳好多人恭候佢過關。
噚日去支援班大狀嘅，重有前綫劉慧卿同社福界長毛張超雄，卿姐話，既然白鴿黨達仔話咗一定出選特首，佢就要再諗諗去唔去馬，因為始終唔係好夠時間做準備。而下個星期佢又要去日內瓦出席聯合國社會經濟及文化委員會會議，忙到死。
傳真︰2623-9278
電郵︰[email protected]