美國富家女ParisHilton最近又搵到新男友，佢個名咁啱又係叫Paris，係一間希臘運輸公司嘅繼承人，家底有番咁上下，同Paris可謂門當戶對，佢哋啱key到將頭髮染埋同一隻深啡色，Paris重話想男友快啲同佢生BB㖭。
ParisHilton喺真人騷《SimpleLife》入面見到靚仔就流晒口水個發姣樣，已經見怪不怪，佢重話搵男友都要夠靚仔至得，佢最近就搭上一位叫ParisLatsis嘅青春猛男，有狗仔隊偷拍到Latsis喺Paris拍緊新片《PledgeThis！》嘅時候到場探班，Latsis重將自己個頭染咗深啡色，襯番Paris咁話。Paris亦對男友嗒晒糖，佢四圍同朋友講，話Latsis咁靚仔，同佢生嘅BB一定好靚，所以好想同佢造人。
不過，好多人覺得Latsis同Paris做人世都要考慮清楚至得，因為Paris份人非常爛玩，又唔專一，雖然佢已經同前男友NickCarter分手，但過去兩個月Paris仍然偷偷飛去佛羅里達，喺Nick屋企過夜。好多熟悉Paris嘅人都知佢朝三暮四，聽日又唔知佢愛上邊個，所以Latsis真係要三思呀！