一班中港台歌星前晚雲集廣州出席頒獎禮，現場保安未有因反日浪潮而加強，譚詠麟和李克勤輕易被歌迷衝上台熊抱。曾着日本軍旗服的趙薇出場時被噓「抵制日貨」，而房祖名提及日軍當年暴行時，表示「聽到都嬲」。
譚詠麟、李克勤、古巨基、趙薇及容祖兒等歌手前晚在廣州天河體育館出席雪碧榜頒獎禮，廣州日前有激烈的反日示威遊行，雪碧榜為避混亂而延期一天，但前日所見，市民及觀眾的反日情緒仍然激動，但會場保安卻未有加強。
趙薇曾經因穿上日本軍旗服而惹起連串風波，更被淋糞，前晚當她出場時，台下有人以廣東話大叫：「抵制日貨！」趙薇充耳不聞，她本準備接受媒體訪問，後來也改變主意，快步離場。全晚高潮算是得「全國榮譽歌手大獎」的張明敏獻唱《我是中國人》，全場觀眾和唱，情緒異常高漲。
雖然天河體育館外日前曾舉行反日示威遊行，但前日會場未有加強保安，場館內有數十名保安人員維持秩序，後台則只有五個左右。當節目進行至尾聲，秩序開始混亂，阿倫及李克勤演出時，歌迷竟可輕易衝上台，一名男歌迷更熊抱阿倫，嚇他一大跳，現場保安視若無睹，而歌迷親近偶像後，即自行下台。
房祖名事後接受訪問時提到反日，態度跟其父成龍迴避不談大相逕庭，祖名說：「日本人以前做過嘅嘢真係好誇張，我細個時好憎日本人，聽爺爺講佢差啲俾日本人殺死。我睇過啲圖片係十個女人俾人用支嘢串埋一齊，有十支嘢排晒喺度，即係一百個女人，啲人又當BB頭係波咁踢，又話BB肉最好食，聽到都嬲。𠵱家啲人反日情緒咁激動係可以理解，不過唔係個個日本人都咁壞，係日本政府嘅做法唔好囉，中國人都唔好忘記自己係中國人，要將中國好嘅嘢發揚光大。」
李克勤騷後提到反日新聞時，只認為中國外長李肇星日前的言論不卑不亢，之後將發言權交給阿倫，阿倫表示市民於表達完自己的情緒後，應該將所有事交由國家處理，他說：「改歷史呢啲渾水摸魚嘅嘢當局唔啱，真理係唔可以歪曲嘅，中國係一個強大國家，應該可以用佢嘅力量影響周邊國家。」
不過阿倫覺得不應用暴力解決問題，他說：「好多遊行時打爛咗嘅嘢都可能係中國人投資嘅，我好欣賞今次香港遊行時主張唔好用暴力，同埋冇可能將屋企一半嘅用品拋晒出街㗎。」阿倫強調自己身上所穿的都是泰國及比利時的服飾。
此外，前晚頒獎禮上陶喆得四個獎成大贏家，容祖兒得三個半獎，李克勤、古巨基及趙薇都各得三個獎（見附表）。
而奪得「香港地區最優秀創作歌手大獎」的黃家強表示，日前有部份歌迷於其個人網頁投訴大會的投票系統有問題，他說：「我知道今次呢個頒獎禮係可以網上投票嘅，但係我有啲fans話，佢哋發現投完我票之後，發現我個票數都係得零票，我都覺得有啲怪，可能個系統壞咗啦。」
採訪、攝影：曾小嘉
