楊千嬅日前喺番禺嘅英東體育館開演唱會，呢個場都幾大，開咗三面台都已經有成萬六個座位，現場望落去呢個戶外場就冇乜空位剩，睇嚟千嬅都幾受歡迎。
內地嘅fans一向熱情，演唱嗰日咁啱一開場就落雨，唱到途中啲雨愈落愈大，但啲fans都冇走到，重有好多情侶雙雙對對咁擔遮睇騷，不知幾浪漫，搞到台上嘅千嬅，感動到喊出嚟，千嬅同鄭中基分手後，一直未遇到好對象，難怪佢見到人哋甜蜜會咁激動嘅。
另外，千嬅噚日去商台接受訪問，講到自己嘅擇偶條件，佢話想同年紀大佢好多嘅男人拍拖喎，因為未試過，重話男人年紀大一定唔會咁幼稚，又可以照顧自己，最緊要係唔好講大話，問佢係咪俾人呃得太多先會咁講？千嬅話：「唔係話以前嘅唔成熟，過咗去嘅感情就唔可以比較，但坦誠係相處嘅必要元素。」
吳宗憲前日凌晨喺台灣俾人伏擊，佢頭部受傷縫咗九針，吳宗憲受傷後失血高達1000cc，佢嘅右眼角膜有個大窿，幾乎睇唔到嘢，𠵱家每日都要返醫院覆診。對於有報道指件事懷疑係吳宗憲招惹到黑社會大佬嘅女人而引起，佢噚日否認：「這是千真萬確沒有的事。」
中國中央台新戲《陸小鳳》嘅卡士原本有意由日本演員竹野內豐扮陸小鳳、何潤東扮西門吹雪、唐澤壽明扮葉孤城，但基於內地近日反日情緒高漲，所以𠵱家改由郭品超取代竹野內豐。上影春天副總經理陳健話：「我們對郭品超有信心，會把他塑造成古代的零零七，何潤東角色不變，葉孤城可能會找香港演員，十位女主角目前敲定的只有陳怡蓉。」
黎明嘅師妹衛蘭（Janice）噚日喺商台接受訪問，問佢最想同邊個樂壇前輩合作，佢竟然話最想同麥浚龍（Juno）合作，Janice話：「我好欣賞佢啲歌、同埋跳舞，因為佢啲歌比較特別，如果可以合作嘅話，最好唔好唱情歌，因為之前唱得太多。」
