北京、上海、深圳反日示威，不少中國人（包括香港人）經營嘅商店受到損害，正正式式係城門失火，殃及池魚，以後佢哋開辦日本餐廳，應該大大隻中文字寫明：愛國人士經營。
世姪Ｍ做咗三年旅遊團導遊，經常在外頻撲，年紀輕輕就經常下身作痛，睇咗好多次醫生，最後醫生要佢做超音波檢查，發現係腎生石，於是入院做手術碎石。據醫生講，凡經常忍尿，少飲水，就會容易腎生石；世姪Ｍ入行之後，大概過於緊張份工，帶團時唔敢多飲水，以免上廁所，竟然患上此職業病，真係搵食艱難。
醫好之後，世姪Ｍ照常東奔西跑，去完土耳其就帶隊去泰國，呢幾日又去咗日本。睇電視見到中國學生示威，高喊抵制日貨，於是打電話問世姪Ｍ媽咪：「喂，Ｍ仔去咗日本，冇事吖嘛？」Ｍ媽咪話：「唔知喎，佢又冇講，佢留低咗個日本手機電話，不如你問吓佢。」
呢排晚上九時後，用手機打電話去日本，每分鐘只收兩毫半，好抵啫，於是等到曼聯對紐卡素爭足總盃決賽開波之後，先至打電話去日本，東京已經係晚上十點幾咯。問世姪Ｍ：「唔怕有事吖嘛？小心啲好喎。」世姪Ｍ大笑：「丁山叔唔使神經緊張，東京一片太平，啲人完全唔理會上海示威。今日下午我帶人去秋葉原睇電器，周街都係人，好多商店扯橫額，用中文字，歡迎中國遊客，又有商店喺玻璃窗貼出中文告示：本店有中文專家為客人繙譯。都唔知有幾多大陸客在秋葉原掃貨，掃得唔知幾高興，啲日本商店東主更高興！」
睇嚟啲愛國人士如何俊仁、馬力等等，應該要呼籲埋杯葛日本旅行團！